У інтэрпрэтатары тэкставых квэстаў UrqW з’явілася беларуская мова інтэрфейсу.
Тыя невідушчыя, хто цікавіўся кампутарнымі тэкставымі гульнямі і натрапляў на платформу тэкставых квэстаў Urq ведаюць, што для нашага брата былі даступныя толькі два прайгравальнікі: Akurk і UrqW. Абедзьве гэтыя праграмы распрацаваў Аляксандр Сяўругін пад нікам Akela. Для Akurk патрэбны былі папярэднія танцы з бубнамі, джоўс-курсорам і адвязваннем рэжыму навігацыі NVDA, але ўсёж пасля можна было далучыцца да цікавых прыгодаў.
UrqW, або, як яго яшчэ называюць, Web-urq наогул быў ад пачатку даступны для скрынрыдэраў, бо выкарыстоўваў для гульні любы інтэрнэт-браўзер, усталяваны ў сістэме. Гэта вэб-прыкладанне, якім можна карыстацца як анлайн, так і лакальна.
Akela гэтыя распрацоўкі закінуўі адыйшоў ад urk-супольнасці, затое сцяг падхапіў вядомы нам праграміст Мікіта Цэйкавец. Ён працягнуў далейшае ўдасканаленне UrqW, дадаў туды шмат штук, якія робяць геймінг невідушчых нашмат лягчэйшым і яшчэ дадаў магчымасць інтэрнацыяналізацыі. Раней прайгравальнік меў толькі рускую мову інтэрфейсу. Цяпер на выбар ёсць англійская, руская мовы, мая беларуская лакалізацыя і яшчэ ў бліжэйшым часе далучыцца і ўкраінская, якую мусіць зрабіць адзін добры чалавек.
Калі вы зойдзеце на старонку прайгравальніка, то ён, гледзячы на мову вашага браўзера, выбярэ адпаведную мову аўтаматычна. Мову інтэрфейсу можна пераключыць уручную. Уверсе ёсць адпаведны камбінаваны спіс. Таксама ёсць зачын для шматмоўнага анлайн-каталогу. Рускамоўных гульняў зараз бальшыня, але што-нішто знойдзецца, калі адфільтраваць гульні па англійскай ці украінскай мовах.
Гадоў 10 таму я актыўна займаўся перакладам urk-гульняў на беларускую мову, трохі пісаў і свайго. У гэтыя гульні можна пагуляць на нашым сайце ў анлайн-прайгравальніку.
Там плэер усё-яшчэ стары, дзесяцігадовай даўніны. Я крыху пазней збіраюся абнавіць яго на найноўшую версію.
І яшчэ намерваюся прапанаваць беларускамоўныя гульні ў анлайн-каталог афіцыйнага прайгравальніка, але перад гэтым хачу пераправерыць усе свае пераклады на якасць работы. Усё-ткі больш за 10 гадоў мінула, пэўна гшто знойдзеццца што пераправіць і ўдакладніць у тэкстах.
Калі вы не хочаце доўга чакаць і жадаеце пагуляць у абноўленым прайгравальніку ў беларускія гульні проста зараз, то [вось па гэтай спасылцы спампуйце калекцыю гульняў і запусціце іх у прайгравальніку ад распрацоўшчыка.